Monday, January 30, 2006

بيني أنا و هو

هو: ها شكثر بقالك عالتخرج؟
أنا: بقى كثر إلي راح و أكثر شوي
هو: يالله ما عليه.. هونها و تهون انشالله و موفق
أنا: أجمعين حبيبي
هو: أحس في نبرة بصوتك ماني قادر أميز شنهي
أنا: ياخوك مستانس و ضايق خلقي بنفس الوقت
هو: عسى ما شر.. بيعني بالسوق
أنا: ما تييب لي شي ولا جان بايعك من زمان يالدثوي
هو: أفااااا حسووون هذي آخرة العشرة و العيش و الملح
أنا: أتغشمر يبه علامك.. بعدين لا تألف ما اكلت معاك شي ليلحين.. ولا بس شي كبير و بتقوله يعني
هو: ايييه عبالي.. انزين قولي شفيك
أنا: أحمد الله و أشكره انه عطاني هالفرصة.. لكني شوي متضايق انه هاد أهلي و ديرتي
هو: يبه هذا احساس عادي.. بعدين لا تنسى انك هناك علشان أهلك و ديرتك.. فلا تتحسف.. الي قاعد تسويه مو شوية
أنا: ياخوك غير جذي فاقد المطاعم.. الشوارع.. الناس بعنجهيتهم و جنونهم و حلاوتهم.. شعب دمه خفيف و له وحشة
هو: يبه كله مصبنجية و عقد.. لا تقص على روحك.. لاحق على هالسوالف.. نسيت الي قلت لي اياه يوم قبلوك بالبعثة؟
أنا: ذكرني
هو: ايييه.. مو انت الي قلت ما بغينا نفتك من هالديرة.. حر و رطوبة و ماكو اماكن تروح لها من غير لا تشوف مصبنة؟ ولا جنك واحد منهم
أنا: الحين انا صرت المصبنة يالثور؟ مو انت الي رقمت بنت جيرانكم جان يلحقك ابوها بالفريج؟
هو: كنت ياهل.. ماعلينا الحين.. الله يفضحك نفس ما فضحتني
أنا: ياخوك انا قلت كلام وايد.. بس والله ما يحس الشخص بقيمة الشي الا لمن يفقده.. و انا فاقد وايد
هو: ميخالف.. مو مطولة السالفة انشالله
أنا: تتكلم و جنها جم شهر مو جم سنة
هو: تمر مر السحاب صدقني
أنا: شوي شوي ترى مو لايق عليك الكلام الكبير يا صبي.. نسيت البدليات الي كنت تقطها قبل.. أطلع الدفتر؟؟
هو: الله يلوع جبدك انت وظيفتك نشر غسيل؟؟ شفيك علي
أنا: حتى النجرة بيني و بينك فاقدها ياخوك لا تلومني.. ما توقعت يوم أفقد سنين الثنوية و الربع
هو: اييه.. ايام والله... تذكر يوم نقص الساعة و نلعب كرة؟ جان تمل من اللعب و تروح تفتن علينا عند مدرس البدنية؟
أنا: اييه محد قال لكم تحطوني حارس!! فوضى اهي؟؟
هو: سنع لعبك و تعال كلمني.. أفكر ألعبك دفاع حزتها
أنا: تفكر بعد.. ايييييه زمن.. ياما غششناك بالامتحانات يالأحمق و الحين تمنن
هو: الله و الامتحانات الي مغششني فيها... فنية و انجليزي و امتحان جيولوجيا مغششني غلط أذكر
أنا: أنا قلت لك الشمس تدور في مسار اهليلجي.. من وين يبت مسار بهلولي انت مادري.. خليت استاذ مدحت يضحك عليك وحنا طول الكورس الي قاعدين نضحك عليه
هو: مدحت كان حاط علي.. عسى ما أحد طلع صوت بالصف يوقفني انا و يخليني أسمع أسماء الصخور الله يلوع جبده
أنا: اهيهيهي و ما كنت حافظ الا نوعين منهم بعد حلاية الويه
هو: أيام والله... تذكر الفنية مقرر الخشب؟؟
أنا: شلون ما أذكره... الي كنا نهرب امتحانات العملي حق منجرة بالشويخ عشان يخلص لنا الشغل
هو: اييه مادري شلون عدت على خير
أنا: قولي.. شخبار الديرة
هو: ياخوك خايف عليها
أنا: شدعوه.. ليش شصاير؟
هو: تفتحت أكثر و بطريقة تخرع... الأوادم قاموا يقلدون الغلط تقليد أعمى
أنا: شصاير مثلاً؟
هو: اهي قصات الشعر اهي الملابس اهي التصرفات
أنا: شخباري.. من عمر الدنيا و انا اشوف الشباب بقصات تضحك شمعنا الحين اهيهيهي
هو: انزين تشوف شباب و بنات بحفلات خاصة مع بعض؟
أنا: يالثوووووور... ونت ناطرني أمشي من الديرة عشان تروح حفلات خاصة بروحك؟؟؟
هو: لااا صدقني فضول فضول بس
أنا: فضول في عينك.. بعدين اسمها حفلة خاصة... شنو تتوقع يسوون فيها... يلعبون كوت بو ستة ولا يدرسون
هو: بس ماتوصل ليه هالدرجة تكفة!! لييش؟؟
أنا: بعد.. اعزل شباب عن عايلات و اعزل طلبة عن طالبات.. يصير عندك مجتمع كبير من شباب و شابات "خالف تعرف" عدل؟
هو: يمكن.. مادري
أنا: الله كريم
هو: حسوووون لك وحشة
أنا: و أنتو أكثر... ادعوا لي

Sunday, January 29, 2006

من بر الصبية

منظر جميل ماشالله... جنه في أريزونا مو الكويت... هدوء و جمال طبيعي بعيد عن صخب المدينة
العرفج (او العرفي).. يصلح يحطون صورته عالنص دينار .. خوش رمز لول
نبتة غريبة.. الي يعرف اسمها لايبخل علي بالمعلومة يا جماعة الربع
بعير وسيم.. ما قدرت أقاوم تصويره
ناقة مجتهدة.. صاعدة مرتفع بحثاً عن العرفج (أو العرفي) و انا صاعد معاها حق التصوير
نفس الناقة.. لو تتكلم جان قالت: هذا الي بطيحه من فوق الحيين.. خو ماصارت تصوير لووول
حسيت انها لقطة حلوة.. شلونها؟
هذا والله أعلم يسمونه "بويعل" صح؟ ذبحني على ما صورته.. كله يعطيني ظهره لوول جنه زعلان ... زعل بويعل


هذي جم صورة أخذتها و انا بالكويت.. بر الصبية
ارجو انها تعجبكم

Saturday, January 28, 2006

حسون الفلسوف

جميل: ان يكون للواحد رأي
مو شي: اذا حاول يفرضه على الأوادم

جميل: ان يجتهد الواحد في شغله
مو شي: اذا هالشغل و الاجتهاد يكون على حساب الصحة و راحة البال

جميل: ان يغير الواحد شخصيته
مو شي: هالتغيير يكو للأسوء أو للأسباب الخاطئة

جميل: ان نحب و ننحب
مو شي: نحارب عاداتنا و تقاليدنا في سبيله

جميل: ان تكون صداقات كثيرة مع الناس
مو شي: تكون معظمها حق المصلحة الشخصية

جميل: ان يكتسب الشخص عادة حلوة
مو شي: ان يتخلى عنها

جميل: اذا الواحد يعد غلطاته
مو شي: اذا ما تعلم منها و تفاداها

جميل: ان تكسب حب الناس
مو شي: تدوس على روحك علشان هالحب

جميل: ان ننفتح على المجتمعات
مو شي: ناخذ الشين منهم و نخلي الزين

جميل: انك تسوي خير
مو شي: اذا ما قطيته بحر

Friday, January 27, 2006

pimp my time

came back from class (1:00 pm).. have lunch.. sit -with eyes wide open- in front of TV watching a movie that I already have seen (twice if not 3 times!).. movie ends.. check e-mail.. log off.. log on again.. MSN.. chat with dude.. log off.. log on again.. check e-mail again (not waiting for a paticular e-mail btw).. log off.. yawn.. sleep it off (3:00 pm for gods sake!!).. wake up (7:00 pm).. finally do homework.. yawn.. go to gym (this and the homework part.. most notable things ever done during the day!).. come back from gym.. Hit the sack counting sheeps again after only a coupla hours since my last nap!!
wouldn't it be cool if you had more than 24 hours a day?
I always asked myself that question, but then again I reply to myself "dude... first you need to manage your regular 24 hour day... you cannot let a day pass without wasting 28 hours goofing off and chewing on gum over some silly celebreality show on TV and you're wishing for more than 24 hours a day?!"
that sucks... yuppers.. that sucks to the power of sucks to infinity! Time management sounds so easy yet I still "manage" to waste time instead of taking advantage of each minute.
given the information above.. i have decided to fully organize my life.. and actually count how many tasks (WORTHY ONES!!) I have accomplished during the 24 hour day.
In other words.. there will be no nap.. no homework.. no meal.. no dip in the mensroom that's not on my agenda!!
Donald trump manages to handle and keep up with his countless business.. so can I !!!!!!
okay well I might not be "as good" as this guy (deffinately not as handsom) but i will try my best.

"Suspect each moment, for it is a thief, tiptoeing away with more than it brings"

Thursday, January 12, 2006

حسوووووون ليش البلوق؟

تقرى بلوقات اوكيه فهمنا.. ترد عليها اوكيه مو أول ولا آخر ملقوف مو مشكلة اهي.. السؤال الي يطرح نفسه هني.. و مصدره هو العقول الفطحلية الي داير مدايري.. ليش هاب هاليومين تكتب بلوقات؟ ليش مواضيعك ما يحكمها العقل الإنساني الواعي؟ أو بالأحرى ليش مواضيعك بطيخية؟
ناس يقولون اني مسوي بلوق عشان أتفلسف.. هذا الي انا كاتبه بأول بوست لي مو يايبين شي من عندكم يا جماعة الربع
ناس يقولون انه البلوق يعوض عن نقص حاد في شخصيتي.. اهيهيهي انزين شنو بالبوستات الي حاطها تدل على نقص في شخصيتي؟ غلطان الا فيني نشلة و قاعد أدور علاج ونت الصاج
ناااااس (و هذيل الي ضحكوني وايد) يقولون اني ابي أستقطب الفئة النسائية عن طريق البلوق لأغراض غير إنسانية (ابي أضبط يعني) انزين اذا كلامكم صحيح ليش مو حاط ايميلي ولا اسمي الصجي ياجماعة الربع.. أروح المارينا أو اتمشى بالسيارة عالخليج وايد أسهل لي (ارجع إلى موضوع صيد اليوم)
و هلم جره من التحاليل النفسية التي هلت علي من علماء النفس و فلاسفة عصرنا الجبار بصدد معرفة سبب نشئة هذا البلوق الفقير
يا جماعة الربع... هالبلوق انا حاطه عشان اكتب فيه أي شي يخطر على بالي.. مو شرط يكون موضوع مهم أو ذي صلب.. تسألون ليش عيل أشارككم بمواضيع مالها معنى؟؟ وايد أمور بهالديرة مالها معنى و قاعدة تنكتب بالجرايد.. ردت على بوستاتي المسكينة؟؟

مالي و مال الناس يلفونني سفهاً ديني لنفسي و دين الناس للناس

آسف عالقصور يا جماعة الربع :)

Wednesday, January 11, 2006

مباركٍ عيدكم يا جماعة الربع

ولو انها متأخرة شوي.. حبيت أعايد عليكم و أقولكم عسى أيامكم دوم سعادة و فرح و أعياد
توني راد من سفرة و للأسف طوفت العيد بالكويت... يالله الأعياد الياية انشالله
أسعد الله أيامكم يا جماعة الربع

Saturday, January 07, 2006

عفواً.. للذكرى فقط

لا أقوى على شريط الذكريات الذي يمر في ذهني كلما أغمضت عيني.. عنده أتلذذ في عذوبة الهواء الذي يحيط بي .. أستمع بكل خشوع إلى نغم الهدوء الذي يسود الأجواء..مستسلماً للقطات الطفولة البريئة التي عشتها
نعم.. فتلك هي الحديقة الشاسعة ذات الورود التي طالما ركضت فيها متسابقاً مع أنفاسي.. نعم.. ذلك هو متجر الحلوى الذي طالما أكلت فيه مفسداً شهيتي للغداء.. نعم.. هناك مدرستي التي قضيت فيها معظم وقتي مع أصحاب الطفولة بين الاجتهاد في الدراسة و الشغب
أفتح عيني... أرى حديقة حقيرة ذات زرع شائك... يسودها جو مقبري... ليس للطفولة مجال في ارتيادها... أين ورودي المتفتحة؟
ماذا أرى هناك؟ إنها أرض قاحلة... أين متجر الحلوى الذي كنت ألجأ اليه ملبياً نداء الطفولة؟
أقف حائراً بين تلك المناظر.. لا أملك سوى الدمع.. أذرفه حسرة على اللقطات الجميلة التي أصبحت و للأسف... للذكرى فقط

Wednesday, January 04, 2006

شخصيتي و كيفي

قاعد بمقر عملك مجابل شغلك (بشتك تحت ابطك نوطك بو ألف .... لول) و فجأة يدش عليك واحد الله يستر عليه ينهال عليك بالشكاوي و يعدد لك سلبياته ومشاكله في الحياة كأنك انت الاجابة لكل دعواته. أو يدش عليك شخص انتهازي يحاول يستغل نقاط ضعفك في شي معين في سبيل انه يبيعك تيليفونه النقال :P
ودي اليوم اشارككم معلومات ليست بالحديثة أو الناتجة من بنات أفكاري... انما أخذتها من كتاب "التعامل مع أناس لا تحتملهم" للدكتور ريك برينكمان و الدكتور ريك كريشنر
حسب ما يقول الكتاب.. الفن في التعامل مع الشخص الي جدامك اهو أول شي معرفتك حق شخصيته و هدفه من التعامل معاك.. و من خلال معرفتك هذي راح تقدر تتفادى أذيته أو تنصحه أو... حتى تستغله اذا تبي (اهيهيهيهي).... تعالوا نشوف شنو أنواع الشخصيات الي حاطها لنا الكتاب
- الدبابة: بهجومه المندفع العنيف، و بصوته العالي القوي، أو بالحدة الهادئة و الدقة الجراحية لليزر، يفترض الدبابة أن الغاية تبرر الوسيلة. لا تتوقع منه الرحمه
هذا الله يسلمكم يحب يحط الناس أمام فوهة مدفعه (حلجه) و يهاجمهم بانتقاداته سواء كانت بناءة او محبطة
الحل: ببساطة.. لاتحاول تهاجمه أو تنسحب لانه هذا راح يعزز من موقفه.. حاول تنال احترامه بطريقتك الحلوة عشان تتفادى هجومه

- القناص: هذا الشخص الذي يعمل في الخفاء يتعرف على نقاط ضعفك و يقوم باستخدامها ضدك عن طريق ما يثيره حولك من وراء ظهرك أو احباطك أمام الآخرين
هالحبيب عادة ما يكون حاقد عليك أو يغار من نجاحك.. لهذا يحاول احباطك و مهزلتك امام الناس مستغلاً لذلك نقاط ضعفك... مرات حتى يبي يستخف دمه لا أكثر ولا أقل ... لكن على منووووو هاهااااااي
الحل: لا تعطيه فرصة يتربص.. وقفه عن الكلام و شوفه في عيونه و كرر كلامه... اقطع الي قاعد تسويه و انتبه حق الي قاعد يقوله.. هني يضعف موقفه.. الحل شكله غبي شوي لكن حسب ما يقول الكتاب هذي طريقة فعالة اهيهيهي

- الموافق دائماً: بموافقته السريعة على الوفاء بالالتزامات، و تأخره في تنفيذ ذلك، فإن الموافق دائماً يخلف وراءه ذيلاً من الالتزامات التي لم يتم الوفاء بها و الوعود المخلفة. و رغم انهم لايرضون احداً بتصرفاتهم هذه، الا ان الموافقين دائماً يلزمون أنفسهم بشكل مفرط من أجل إرضاء الآخرين
الله يعينه هالشخص.. مسكين و على نياته... لكنه بطيخي ما يدري شنو يبي... أرضي نفسي ولا أرضي الناس؟ ماعنده ميزان مثل ما تقولون
يجيله واحد بالشغل يقوله "تقدر تخلص لي هالشغلة ماعليك أمر؟ ابي أطلع مرتي اليوم و بزرق من الدوام" اييييه ليش لأ... يجيله رفيجه الثاني يقوله "ودي تسدي لي هالخدمة الي ماراح انساها لك طول عمري... ولدي بالمدرسة و ماقدر أطلع آخذه.." ايييي ليش لأ.. اييبه لك... فجأة يشوف نفسه مديون بالالتزامات و الحل الوحيد اهو .... السحب على الجميع و كأنه العيد (بحكم انه ميزانه الأخلاقي مضطرب نوعاً ما) و يخلق المشاكل و التبهدل
الحل: قو العلاقة بينك و بينه... تأكد انه المهمة الي وكلته اياها سهلة و تقدر تعتمد عليه فيها (كونه انسان صعب الاعتماد عليه نظراً لشخصيته المضطربة) و حسسه انه اذا خذلك راح يجرح صداقتكم... بهذا راح يحط هدف في باله مو أنه يسوي المهمة الي عطيته اياها,,, انما المحافظة على صداقتكم

وايد شخصيات بهالكتاب و طريقته في تحليلها واااايد حلوة... ما يمديني أكمل بس حبيت أعطيكم فكرة و أشارككم بهالجم شخصية الي نتعامل معاها وايد في مجتمعنا

Monday, January 02, 2006

حسوووون شفيك؟

تلقوني قاعد بريحاتي... كافي خيري شري... سرحااااااان بالماضي الي راح و بساطته... أحاتي و أخطط حق المستقبل المعقد... ليش وصلنا مرحلة مانقدر نكتفي فيها بالأساسيات... أو بالأحرى التعقيد و الفشخرة و حب الظهور صار من الأساسيات؟
أو تلقوني قاعد أفكر... ليش صار من التقليد انه غدانا لازم يكون فيه عيش.. مع انه كثرته مو زينه
و مرات تلقوني سرحان في الطفاية المحطوطة على الطاولة الي جدامي و أقول... هذا الي اخترع السيجارة انسان عبقري... شلون فكر انه متعته راح تكون بشوية تتن يلفه بورقة يشبها و يدخنها؟؟
و انا في عز سرحاني... و تأملي و تفكري بكيفية دوران الكرة الأرضية حول محورها و في مسارها الاهليلجي... يفز واحد قاعد يمي و يقولي "شفييييييك سرحااااااان؟؟؟". أي شي صح؟؟؟ ا نزين انا ارد عليه و اقوله "اوكيه... انا غلطت و سرحت شوي.. سامحني.. آمر حبيبي شبغيت مني؟" يرد على بكل براءة ووقاحة............." شفتك سرحان" !!! الله أكبر.. السرحان الحين صار يشكل قلق للمجتمع؟؟
خلو السرحان في حاله ترى ممكن يكون قاعد يفكر في حل حق مشكلة جذرية أو في طور تأليف نظرية قد تنفع البشرية.... خلوني أسرح يا جماعة الربع