استنفار كويتي كروي

...وسعوا الملعب يا جماعة الربع

...لا مو حق زين العذارى

...ولا حق أزيرق

حق الأزرق

الخبر من القبس.. انه قدامى الكرة الكويتية سيشاركون في بطولة الخليج الأولى للقدامى

الأولى: معناتها انه فيه ثانية و ثالثة و رابعة و... الله أعلم شكثر

القدامى: اللاعبين الي وصلوا بالمنتخب فوووق فووووق.. و لمع نجمهم في سماء الكرة

فكرة هالبطولة وايد حلوة.. منها يعلمون المنتخب الحالي شلون يلعبون.. و منها يستمتعون بلعب حلو (الله يستر بس عسى ما كرشوا القدامى و يفشلونا بعد) اهيهي

ما ينلامون ربعنا.. زين ما بدلوا فريق القدم الحالي بفريق كريكيت ولا هوكي.. يتراوالي وايد أشرف من الأداء السيء الي قاعد يتحفنا فيه أزيرق اللطيف

أنا أشوف انه إقامة بطولة مثل هذي تعتبر من المواقف المضحكة المبكية في الدنيا.. فبعد فشل المنتخب الحالي في رفع رؤوس جمهوره الكويتي العريق.. نلجأ إلى أعضاء منتخبنا القديم لينقذوا ما تبقى من روح الكرة في الكويتيين.. قبل ما يفقدون الأمل عالأقل

مادري.. هل أتنفس الصعداء لانه المنتخب القديم راح يأدي جدام الشباب الجدد عشان يتعلمون؟ أو اضحك.. لانه منتخبنا اليديد مو عارف كوعه من بوعه و محتاج إرشاد من لاعبين أقد منه؟ يبه انت شموصلك المنتخب إذا ما تعرف تلعب؟؟

أنا أقول لكم العلة وين. مو في الإدارة... ولا المدرب.. ولا اللاعبين

..... العلة في دكتور المنتخب :P

سلام يا جماعة الربع

رجيم مخ

في ظل التشنج السياسي الحالي.. و تدهور البورصة الكويتية و الأسهم البلورية.. مع نزول أسعار الزبيدي و ارتفاع ضغط المواطن الكويتي... و تدربح البرتقال على أفا من يشيل... قررت أن أتبع رجيم قاسي

نعم؟ رجيم أكل؟ لالالا مو أكل... رجيم مخ.. اي نعم.. شنو رجيم المخ؟ انا أقولكم

رجيم المخ: تقلص في عضلات الفكر الناتج عن تخفيف المصطلحات الصعبة عالمخ و محي الأفكار الهدامة الي تودي صاحبها بستين داهية

قبل لا أدخل في طريقة و فوائد هالرجيم و تأثيره الإيجابي عالمجتمع الكويتي.. خل أسرد لكم بعض الأسباب التي خلتني أميل إلى هذا النوع من الرجيم

أول شي.. انا انسان صحي و أحب أحافظ على سلامة بدني

ثاني شي.. الأحوال البيئية داير مدايري تسمح لي بأن أدخل في هذي الحالة الذهنية.. و الخروج منها بأقل أضرار ممكنة

ثالث شي.. الرجيم مدعوم من جامعة سوق الكويت للأوراق المالية حيث تم إجراء تجربة على مجموعة من المواطنين حاملي الأسهم المنبطحة و المنكسرين مادياً .. و أقر أطباء الجامعة نجاح الرجيم بعد اتباع طرق البحث السليمة على مجموعة المواطنين مع الأخذ بعين الاعتبار عدة متغيرات مثل طول المواطن، خلفيته (الي خلفيته راهية مو مثل الي خلفيته مسطحة)، و أخيراً و ليس آخراً.. طريقة نسف الغترة

-: طريقة الرجيم

يمكنك أخي المواطن اتباع هذه الخطوات البسيطة لشراء راحة البال و توسيع الصدر

اسحب فلوسك كلها من السوق.. خل ينهار ما عليك-

فل تقتصر نشاطاتك اليومية على شرب الشاهي مع المدام.. و الدوام (اذا متقاعد ساعد المدام في المطبخ..غسل الخس حق السلطة مثلاً-

و بدل ليتات البيت.. و روح الجمعية ترى ناقصنا توست و قيمر و زجاير بوكس أحمر) و خفف من مكالمات الأصدقاء و السوالف عن السياسة

مشاهدة قناة سبيس توون فقط لا غير.. خفف من الأخبار و قراءة مؤشر الأسهم-

أي مصطلح سياسي نقدي أسهمي يمر عليك.. عزيزي.. لا تحاول أن تهضمه.. الفظه.. واستمتع بحياتك-

قاطع علكة أبو سهم... و استخدم دينتاين أو علك بصري-

اتخذ هواية التنس الأرضي، ركوب الخيل، أو تقشير الطماط.. فإنها تريح الأعصاب و تزيد من انتاج هرمون الميلاتونين في جسمك-

يساعدك تنام

و أخيراً .. تذكر أن فلوسك أحسن بجيبك من أن تقطها على سهم صاعد و سهم نازل.. اشتر طراد ولا خيط و جابل البحر وايد أريح-

بال

و بهذا أخي المواطن المغامر.. تكون ريحت مخك و أعصابك.. و بعدها عليك بأمر من اثنين

أن تخوض جولة أخرى مع السوق.. تطرحه أو يطرحك.. و قد يؤدي طرحك إلى البكاء و النياح عند كبار السوق و الهوامير و مجلس الأمة-

... أن تريح بالك و مخك-

حديقة بني حيوان

المفروض هذا حصان بري متوحش....... الي شفته انه ثور الله في برسيمه... حمار مايدري وين الله قاطه

هذا سخيف.. ليش؟؟.. انا أقولكم... اذا رحتوا حديقة حيوان.. و أول حيوان تبون تصورونه يطلع لكم من بيته.. يوقف جدامكم.. يتعصر.. يلبي نداء الطبيعة أمام عيونكم البريئة... و يرد بيته........... مو سخيف؟؟ سخيف و حيوان بعد

ياااي بانده.... مو شايف واحد صجي من قبل.. بس اشوه ما طاح من الشيرة.. ما كان ودي أضحك

عدل عدل الذيب.. شوفوه شلون متسمت حق الصورة الملعون

أكويريوم... قط خيطك داخل و استمتع

سمكة.. بيئولي سمكة!! انته بتهزر معايا ولا ايه؟؟

لول (اهم شي الكرة الي ماسكها) أقدم لكم بيليه.. قبل مباراة اعتزاله

وسيم.. صح؟

سبحان الله

أفعى.. نائمة و بكل فخر

أفعى.. في وضعية الهجوم... بلا فخر

ضفادع صغيرة سامة.. آسف صورتها بسرعة.. خفت لا يحوشني طشار و أتوفى.. فشلة أموت من سعابيل ضفدع.. يضحكون علي الأوادم في العزا

سلحفاة عمرها مادري جم مليون سنه.. تصلح للتحنيط و الزينة.. ترى ضخمة وايد!! واايد

باجي الصور مالها داعي صراحة :)

ارجو اني ماكون ثقلتها.. و اذا ثقلتها هم أحسن

سلام يا جماعة الربع :)

مشروع حيوانات

قوة يا جماعة الربع

قاعد أحاول أحط لكم صور رحلتي مع ربعي حق حديقة الحيوان (ادري... وااااو.. شي يديد محد فكر فيه من قبل) بس الظاهر في مشاكل فنية (و قد تكون أخلاقية.. حيث أن جميع الحيوانات المشاركة في معرضي عارية) .. لا تحاتون.. دام بوعلي معاكم.. لا تحاتون يا جماعة الربع

عطوني فرصة أشوف شالسالفة و أبحث و أرجع لكم انشالله

سلام

من المهد إلى اللحد 2

و تستمر سلسلة من المهد إلى اللحد في كشف أسرار و خبايا العقل البشري الكويتي المفطحل.. و فبركاته الدفينة و عجائب تفكيره البلوري

ذكرنا في البوست السابق من هذه السلسة فئات العمر من 2-4 سنوات و قلنا شلون هم حلوين و كيوت. و سلف أيضاً ذكر الأطفال من 5-8 سنوات و عرفنا انه هني الياهل يا اما يكون في طور التحول إلى عفريت أم ملاك......... عادة ما يكون عفريت كويتي صغير

و أخيراً و ليس آخراً الفئة بين 9-13... الفئة القثيثة. نكمل معاكم رحلتنا المشوقة لاستكشاف الهيئة الخلقية للإنسان الكويتي

من 14-17 سنة: مراهقة ولا أحلى

معروفة هالفئة بالمراهقة.. يتغير صوت المراهق في هذه المرحلة نتيجة تدهور الهرمونات في جسمه.. مع ظهور خط شنب خفيف و نوعاً ما لحية منتفة..و طبعاً ما ننسى حب الشباب (اهم شي الي يطلعون عالخشم)

.. صوت المراهق في هذه الحالة يتكون في من عدة طبقات: هم

طبقة فرعونية: اذا عصب يغلج صوته و يكون في حالة دفاع عن النفس

طبقة البنت الأليفة: اذا قاعد يترجى ابوه عشان ياخذ السيارة أو في حالة الخوف او الإثارة

و عادة ما تختلط هذه الطبقات في جملة واحدة... مما ينتج عن ظهور أصوات مضحكة تؤدي إلى إحراج الشاب اللطيف

و طبعاً تغيرات جسمية عنيفة يمر فيها المسكين مثل ما ذكرنا نتيجة الهرمونات.... و في هالمرحلة.. المراهق يعتبر البنت كائن حي غريب لابد من استكشافه

طبعاً يجدر بنا ذكر صفاته و هي: خفة الدم الفضيعة (ايي حتى انا اقول)، حب الظهور و جذب الانتباه(عن طريق تعجيف الشنب أو صبغ الشعر بلون فاقع)، و طبعاً الرياضة (قز في المجمعات لين دلاقه ينقظ و عضلات ريله تتكسر) و هذا باختصار.. مراهقنا الكويتي

فئة ال18 و 19 سنة: يا لطفهم

يطلع ليسن... و ما أدراك ما الليسن

الليسن عند الكويتي: ليست فقط رخصة لقيادة السيارة.. بل رخصة الرجولة.. رخصة للدخول إلى عالم القز الحقيقي.. رخصة للقيام بأي عمل رعوني قد يخطر عالبال (حوادث. معاكسة.. تقحيص تمحيص تفحيص... كله) و طبعاً بهالعمر يكون

عشرة بالمية: يقدمون عالبعثات

عشرين بالمية: جامعة الكويت

سبعين بالمية: يكملون ثنوية 4 سنوات ثانية و يتخرجون دكتوراه تطفير مدرسين و رفع ضغط الناظر مع مرتبة الأرف

و بالويك اند... تلقاه ناطر ابوه يقعد من نومة العصر عشان يقوله يبه ابي 5 دنانير بروح المارينا (طبعاً 2.500 سينما و 1.450 وجبة هارديز و 1.050 حق البنزين) يحليلهم والله هالفئة على راسي

Teenagers فئة ال20 سنة: يحليلهم.. مو

دشوا العقد الثاني من العمر.. تلقاه يحلل كل شي على روحه.. المفروض محد يكلمه.. اهو و سوبرمان واحد.. دربه خضر.. يغير مشيته و تسريحة شعره و يبدي يشيل حديد حق تضبيط اللوك اليديد.. (كرمال صبايا الجامعة الحلوات) يحليلهم

الموتر تلقاه يا ميتسوبيشي لانسر يا فيراري (ودي اسمع بعض الناس يقولون فراري... لوول) و وجود العنصر النسائي في حياته شي ضروري.. حق الفشخرة جدام خلود بو حفرة و حمود القزم و جمشيد السايق

انشالله ماكون ثقلتها عليكم ... انا ودي أوقف هني لانه باجي فئات الأعمار صعبة التفسير و قد يتطلب شرحها بحث عميق و مساعدة من عدة أشخاص

راح اوافيكم بالأجزاء الأخرى أول ما أوقف على أرض صلبة انشالله

تفلسف.. ليش لأ

أين أجدني...... ؟

محلقاً في سماء سوبرمان؟

تائهاً في أدغال طرزان؟

أم غريقاً في أعماق محيط موبي ديك؟

---------------------------

العقبات: هي تلك الأشياء المخيفة التي يراها الإنسان عندما يتخاذل عن تحقيق هدفه

مقولة فلسوفية قريتها مرة.. فعلاً قمت آمن فيها

---------------------------

هل تسعى إلى الكمال؟

نعم

! لكن الكمال لله تعالى

ونعم بالله..لكن الكمال الذي أسعى إليه هو كمال إنساني لا يقارن بكماله عز و جل...... ان مقولتك هذه.. يا بطيخ.. تضع لقدراتك حدوداً و لأحلامك قيوداً انت بغنى عنها.. الكمال لله تعالى لا شك في ذلك.. لكنك مطالب بأن تسعى لكمال روحك و نفسك و جسدك... لا مقارنة بين ذلك و بين كمال الله تعالى و هو البعيد عن الحواس و التشخيص و العياذ بالله

من المهد إلى اللحد 1

ما فكرتوا مرة يا جماعة الربع انكم تدخلون عقلية الشاب الكويتي؟ شنو يسرح فيه؟ شنو يتحلم فيه؟ شنو يبي من البيئة المحيطة فيه؟ شنو خطوته الياية؟ شنو هدفه في الحياة؟

هالكائن الكويتي على طول يفكر.. و يخطط حق مستقبله.. و مايخلي اي عقبة تحول بينه و بين الي يبيه ( انشالله يكون هدفه انه يحمل.. راح يحققه اذا يبي) .. ما هو الكويتي؟

الكويتي: شاب طموح.. كسول و نشيط، يحب جذب الانتباه (تتراوح وسائله لجذب الانتباه من قصات الشعر العبيطة و الخلاجين الي يلبسها إلى عمل طفاحية للسيارة تخليه يسوقها عالماي... هذا الي كانوا يحطونه على استراحة الجمعة تذكرونه؟) و عادة ما يكون هالشاب عنيد و راسه يابس و كثير التحلطم. لكنه حنون و طيب و قلبه أبيض

من 2 إلى 4 سنوات: الطفولة البريئة

حبووووب.. كيووت و لطيف جداً كالحيوان الأليف.. يتمشى و يطيح على حفاظته.. يرد يقوم و ياخذ أغراض يحطها بحلجه.. ضحكته و صيحته عسل في عسل

من 5 إلى 8 سنوات: شوي أقشر

هذي النوعية قشرة شوي... يبجي بطريقة تنرفز و تقث.... عادة ما يكون يمك بالمستوصف أو وراك بالطيارة.... و مو بعيد انه الياهل يبتكر أجهزة تعذيب!! انا اقول لكم شلون... كنت عالطيارة الكويتية.. و وراي قاعدة ياهل من هالفئة العمرية.. عندها لعبة صغيرة و خيط.. ما يصير تلعب باللعبة و تهد الخيط... لاااااااا... لازم تستخدم الخيط بعد.... و تقوم تربط اللعبة بالخيط... و تحذف علي اللعبة... و ترد تسحبها بالخيط... و تحذف اللعبة على أفاي ..... و تسحبها بالخيط......و تحذفها مرة أخرى...تخليها شوي....مديت ايدي صوب اللعبة......جان تسحبها بالخيط......................... ماني قايل لكم شسويت بعدين... أخاف تكرهوني.. أخلي الباجي حق خيالكم الخصب

من 9 إلى 13 سنة: حبوب بس هم ثقيل دم شوي

تلقاه في مرحلة استكشافية فيلسوفية... يسئل أسئلة... معظمها غبية... بس مناسبة جداً حق هالفئة من العمر. يبي يروح كل مكان يبي يشتري كل شي يبي يعرف ليش و متى و شلون........ مثال على هالنوعية الخايسة: محادثة

حمود: يبا ليش ما نروح مطعم؟

الابو: لا بابا امك طابخة اكل حلو اليوم

حمود: امي كل يوم تطبخ.. يعني ما نروح مطعم؟

الابو: امبله حبيبي خلاص راح اوديك مطعم باجر

حمود: اي مطعم توديني يبا؟

الابو: كيفك حبيبي اي مطعم تبي؟

حمود: ابي همبرجر

الابو: خلاص اوديك تاكل همبرجر

حمود: يبا يصير نروح هارديز؟

الابو: اي حبيبي خلاص نروح هارديز

حمود: اي واحد فيهم؟

الابو: المنصورية

حمود: متى امي تحط الغدا؟ انا يوعان

الابو (بدى يتنرفز): مادري روح اسئلها

حمود: يبا تشتري لي بلاي ستيشن؟

الابو: أم محمد... حطي الغدا و عطيني حبوب الضغط و السكر و المرارة و الصداع و في يمج خيزرانه يبيها معاج حياتي

انا اشوف انه البوست صار طويل اهيهيهي.... البقية تتبع

قد تتنرفز... وقد لا تتنرفز

كل واحد فينا عنده شغلة تنرفزه.. تقعد على أعصابه.. تثير غضبه.. تخليه يتنفس بصعوبة و في حالات... يضطر يصارخ و يقول ليييييييييييييييش شنو سوييييت بدنيتي اناااااا؟؟؟؟

احم.. ممكن هالشغلة تكون بسيطة، بس تطلع قرون عند ناس و عند ناس آخرين ما تأثر فيهم..و العكس صحيح... تختلف ردة الفعل من شخص إلا آخر حسب طينة الآدمي و البيئة الي ترعرع فيها و نوعية الحليب الي رضعه من صدر أمه ، و إذا رضع من اليمين أو اليسار أو اذا كان ولد حلال أو مو حلال (على وزن بغل) أو حتى طفل أنابيب

موقف رقم 1: بيبسي يندلق على الزولية

ردة فعلي: اذا كان شخص أول مرة يزورني؟ أضحك و اقوله لاااااا عاااادي تصير وايد (ايي مبين انها تصير وايد.. الا مفتشل منك يا ثور ياللي ما تستحي) و انظف المكان بسرعة و اتحلطم بشكل مو مفهوم بغرض اني اوصله انه الي سواه شي مليق و ينرفز

اذا كان واحد اعرفه... اسفل فيه و اقوله نظفه.. بكل بساطه

موقف رقم 2: أحد يقعدني من النوم

ردة فعلي: اذا نايم أقل من أربع ساعات؟ هاهااااي هالآدمي راح يعيش طول عمره يعاني من آلام في المؤخرة و الراس و احتمال ارتجاج بسيط في المخ و فقدان ذاكرة مؤقت و احتمال ينسى انه ذكر ولا أنثى

طبعاً اذا نايم 4 ساعات و فوق.. ماراح اتنرفز و راح اكتفي بالتحلطم.. طبعاً اذا الوالد اهو الي قعدني من النوم.... في أي حالة لازم أقعد و أطق تحية و ابتسامة قهر مرسومة على وجهي... بعد جبدي الوالد.. الوالدة حياتي تخليني أنام ليه عقب باجر عادي

موقف رقم 3: أحد يشتري نفس اللبس الي انا شاريه

ردة فعلي: طبيعية جداً بالعكس استانس انه ذوقي يعجب الناس ... ادري انه في بنو أوادم يتنرفزون من هالشغلة و خصوصاً بنات حواء.. الله يعينكن يا جماعتن الربعن

موقف رقم 4: أحد يدخن بغرفة نومي

ردة فعلي: يجن جنوني... تقوم القيامة عالآدمي المدخن هذا.. أطفي السيجارة ب... أقوول؟؟ أقووووووول وين أطفي السيجارة ؟؟؟؟؟؟؟؟؟؟ بأذونه هالملعون الوالدين... انزين بتحط ديناميت برئتك و تفجرها عند يدي.. لكن تدخن في مضجعي؟؟ هيهاات .. تأبى المروءة يا خسيس

موقف رقم 5: أحد ياكل من صحني

ردة فعلي: واو أستانس صراحة ... مادري ليش.. بس ماحب يبربس وايد و يحط ايده و بلاوي ... شحلاة الخاشوقة (القفشة أو الملعقة) و يفضل انه ما يكثر من هالحركة لانها قد تؤدي إلى النرفزة و من ثم إلى الإصابات المذكورة أعلاه

موقف رقم 6: اذا تمشيت مع واحد من الربع و فجأة مسك إيدي

ردة فعلي: حياتي ... حبيبي ... ما أذكر مكتوب بعقد الزواج انه نمسك ايد بعض جدام خلق الله...... يااااااا ثوور ... ياااا حماار ... ياااااا شاذ ... ياااا متعجرف... شكو يعني ماسك ايدي ؟؟؟ حب ؟؟؟ حبك برص يا روح أمك... ولدتك و نسيتك؟ ولا مرتي وانا مادري؟ ولا تبي توري الناس انك كوول و عاطفي و رومانسي... على أفا سمعتي يا حلو؟؟ روح امسك ايد واحد ثاني يبه مو أنا الي يمسكون ايدي.... مالت حتى مالت

ملاحظة: قد يتهيأ للقارئ أنني أتميع و أتمطق في الفقرة السابقة.... لكنني لم أفعل ذلك

موقف رقم 7: أمسك عربانة الجمعية واذا بشيء دبق و لزج و مقرف و مقزز يحوش ايدي

ردة فعلي: الحمام.. السيارة.. البيت.. أنسى انه صار شي بالجمعية

موقف رقم 8: زميل أيام الثنوية .. يأتي الى المدرسة متعطر و مسوي شعره سبايكي... بس رائحة فمه جنه ماخذ هيلاهوب و حاط داخله فص ثوم و منقعه في بلاعيمه ثلاث أيام.. و تريق عقبها مهياوة حاطها بالشمس اسبوعين و نص... و مدخن زجاير كيلوبترا قبل لا يجي الدوام و يقولي ههههههلااااا بالححححبيييييب

ردة فعلي: حبيبي... شنو تدل في الجمعية غير راعي الحب و البنك و البسطرمة؟؟؟؟ انا اقولك ... تعرف وين... لالا اسمعني .. مو معجون أسنان.. راحت عليك حياتي المفروض تستخدم المعجون من زمان... شوف انا اقولك... تعرف وين منظفات الحمام؟ دور لك شي يحلل المعدة.. يفتتها.. روح توفى جم يوم و فكر بالمصيبة الي انت فيها بعدين تعال... ماشي؟؟

شنو الأشياء الي تنرفزكم..؟؟ شاركوني يا جماعة الربع :)