قوة.. شلونكم جماعة الربع؟ انشالله بخير؟
---
من عادات و تقاليد و أعراف بعض الناس في الكويت و غيرها من الدول المتقدمة أن يكون الترحيب بالضيف حار و ذي مستوى راقي عن الجفافية و التقشف (هدي بالك حسون ترى كلام كبير هذا) ... لكن ما سألتو أنفسكم يا جماعة الربع.. هل كيف لو زاد هذا الترحيب عن حده؟ هل تتأزم الأمور إلى أن ينقلب ضده؟ تعالوا نشوف...
كثير ما ينعزم البني آدم على أمئدة الأطعمة (جمع مائدة الطعام.. أدري غلط لحد يصلح لي رجاءً) ... و مو بالضروري انه يكون يوعان لكن من واجب المدعو أو المعزوم على أن يشارك في الأكل احتراماً و تقديراً لجهد الداعي أو العازم على إعداد الوجبات الشهية
السيناريو كالآتي... قاعد عالسفرة يا جماعة الربع.. و صاحب المكان عينه علي.. يترقب و يتخزز في ما آكله و ما لا آكله.. و كأن لسان حاله يقول .... ابي اشوف شلون ما تاكل يا حلو، كل هالأكل أنا مزهبه حق أمي؟؟ اهيهي... المهم... و انا أهم بالقيام... بعد عدة سويعات من الأكل الخفيف و الضحك و السوالف.. صار الآتي
أنا: أكرمكم الله يا فلان
المضيف: لاااا ما أكلت شي
طبعاً يقولها و حلجه متروس طرشي مانجا.. و أيده كلها عيش و معبوج (فلفل حار جداً) و الخروف جدامه يبجي يقوله تكفه بس ما بقى فيني شي تاكله
.....أنا: لا طال عمرك أكلت وايد نعم الله عليكم سفرة داي
قبل ما أخلص جملتي.... أشوف قطعة لحمة طايرة بالهواء الطلق متجهة نحوي.. اذا ما خاب ظني كانت من الفخذ... لحظات و توصل اللحمة و تهبط على جبهتي... خلال هذه اللحظات تذكرت... انه بسرعة البرق قبل ما يحذف اللحمة علي... شفته يلحس (يلعق) ايده المدمرة بكل ما لذ و طاب من المأكولات.... و تالي حذف اللحمة علي
أجزاء من الثانية حتى ارتطمت اللحمة على وجهي و هبطت في صحني بين تصفيق الجماهير و الخدم و الحشم
المضيف: اقعد الله يهداك اقعد ما اكلت شي... اكل هالقطعة و ادعيلي
المشكلة انه...... كان في.... خروف كامل جدامي مو مجيوس..... لييييييش الفلم الأكشن؟ مادري
----------------------------------------------------------------------
التوجيب... تروح تزور الأقارب و الأصدقاء بغرض عدم القطاعة و تشتيت الشرهات و التحلطم عنك... لكن هل من الممكن ان تصرفات المضيف تخليك ما تبي توجب؟؟ لا عاد مستحيل... بس هم أخلي التعليق لكم
تزور ولد عمك... يقدم لك الشاهي... و البسكوت المالح و درابيل الشمالي... تالي تكسر وياه جم يوزة على جم فستقة على كازوتين على ثلاث بيذانات ونت الماشي...... فجأة
ولد العم: هااااااااااااا على وييييين؟؟؟؟؟
انت: والله مواعد واحد من الشباب اطاع معاه
ولد العم: لحظة يبه أنا قايل حق الخدامة تسوي عشا
عشا؟ عقب المصيبة الي أكلناها توة؟ شعشاه؟؟ من صجك ولا تغشمر؟؟ شرايك نتغدى عقب العشا بعد؟
انت: لاا يالحبيب مرة ثانية انشالله لازم امشي الحين.. مواعد الريال و ماقدر اكنسل
ولد العم: هااااااااااااااااا لااااااااا شدعوااااا و الأكل هذا وييين يرووووح؟؟؟؟ شحقههه؟؟؟؟ هههههه؟؟؟؟ ليييشششش؟؟؟
تتحول العزيمة الحين من
ولد العم و لازم نوجبك يبه
إلى
غصبن على أبو الي ياب ام بنت خال عمك تاكل... الأكل ما ينقط... تاكل تاكل.. كنسل مع صاحبك الخايس.. محد قالك تزورني اليوم
هيهيههيي... انزين ليش ما قلت لي الله يهداك انه بتعشيني؟؟ مسويها مفاجأة يعني؟ المفروض أقول
أوه!!! ولد عمي بيعشيني؟؟ اوه.. واااااااو انا مصدوم الصراحة واي مادري شسوي يا بختي يا بختي
-------------------------------------------
سلام مربع للهوست و تحياتي للضيف على روحه الرياضية.. و حرام و عيب تحذفون أكل عالسفرة ياجماعة ترى مو من آداب المائدة... بعدين لا تحطون وايد هيل بالجاي... نبي جاي مهيل مو هيل مجيي.. و رحم الله من زار و خفف
-------------------------------------------
لا تاخذون عني انطباع اني مضيف ثقيل طينة.. ترى غشمرة.. احذف عليكم لحم و اصب عليكم مرق بعد إذا شأتكم.. عادي عندي
