Saturday, December 31, 2005

كل عام و أنا بخير

سنة جديدة دخلت علينا.. أو احنا دخلنا عليها... الي أعرفه انه مرت سنة من أحداث حلوة و أليمة... سعيدة و حزينة... لكن السؤال اهو شنو الي تحمله السنة الجديدة في طياتها؟ أو بالأحرى شنو احنا نحمل حق السنة الجديدة في جعبتنا؟
أناعن نفسي أحب أحط لسته بالأشياء الي ودي اسويها حق السنة اليديدة و بنفس الوقت بالأشياء الي أبي أخليها تنطوي مع صفحات السنة الي بتروح... هذا مثل مايسمونه الربع الأمريكان "نيو يير ريسولوشن" و هاكم اللسته مالتي
- بقطع عادة التأجيل وبصيرانسان أول بأول (ماتدرون شكثر ضار ناس معاي بسبة هالتأجيل) هاهاها
- بركز على أكلي و ماني صاير مشفوح مثل السنة الي طافت (انا مو متين يا جماعة) وبضبط حق نفسي نظام غذائي صحي متكامل
- بخصص يوم واحد في الشهر حق المساج... (لاحظوا شكثربحترم جسمي) و الاسترخاء التاااااام.... يعني عادي هاليوم كله نايم :P
- ماني متزوج
- بحسن علاقتي مع ناس كنت هاملهم لفترة طويلة
- بقطع علاقتي مع البطاط المقلي :`(
- بطور هواية التصوير و العزف عالجيتار (مو قاعد اتفلسف صج انا اعزف و اصور) ادعولي
- يقولون اني وايد اعلج (عادة قد لاتكون سيئة بس مو حلوة عالريال) لازم القا لي بديل... زجاير يمكن
-حياوي ...ودي أشتغل على علاقاتي الاجتماعية ( هالبند غيرعن بند تحسين العلاقات مع الي أصلاً أعرفهم) ادعولي
- أكمل كتابتي بهالبلوق من غير ما أملق على أحد أو اجرح أحد و ودي ودي ودي انه امتعكم بمواضيعي
يا جماعة قبل لا أكتب البوست قلت بحط ثلاث أربع أشياء.... اشوف قمت أنطلق... خل أوقف قبل لا أدش بسوالف مالها داعي اهيهيهيهي
كل عام و أنتو بخير و أتمنى لكم سنة يديدة ملؤها العطر و الحب و المودة بينكم يا جماعة الربع... سلاااااام

Friday, December 30, 2005

صيد اليوم

من عمر الدنيا و الشاب يحاول يطيح البنت في شباك "الحب" و يصارع كل التحديات و العقبات الي تواجهه (الا وهي العادات و التقاليد) من أجل تحقيق حلمه التستستروني. لكن في معظم الحالات تبوء محاولاته للفشل بسبب عدم تجاوب الطرف الآخر (الي اهو البنية) مع حضرة الشاب الفهلوي. الأمر الغريب... شلون وصلت في مجتمعنا الصغير المسالم أنه تنقلب الأية و تصير البنت اهي الصياد و شابنا اللطيف اهو الفريسة؟!؟!؟
كنت طالع مع صاحبي نسوق على الشارع البحري مستمتعين بالجو و منظر البحر الخلاب.. اسوقفتنا اشارة المرور المعظمة.. ثواني ولا نسمع أصوات الأغاني تتعالى من السيارة المجاورة.. بحكم الفضول لفينا ويوهنا نشوف شكو ماكو ... بنتين لطيفتين بالسيارة الفاخرة يترنحون (رقصاً) و يأشرون لنا بأن نشاركهم الفرحة. صديقي كونه انسان بشوش و يحب الدندنة (و الأغنية كانت "لا لي" للمطرب البحريني أحمد الهرمي) فقام بضرب الرقبة (طق الرقبة مو الحد بالسيف) و استانس لفترة وجيزة حتى انشبت الاشارة الخضراء سامحة لنا بالتحرك..
الصدفة المتعمدة... انه نشوف نفس البنتين عند الإشارة الثانية و هالمرة يأشرون لنا بأن نسفط !! ياااااا سلااااااام.. (عمري ما حلمت فيها انه بنت تصفطني) لكن ابت المروءة يا شعب الرجال!! و لاقيت البنت بنظرة عنف و ضجر آملاً بأن تستحي على وييها.... ترجاني صاحبي أن اوقف و قالي "انت مالك شغل لا تكلمهم بس اوقف" امممممم ماشي.. من باب الفضول لا أكثر و لا أقل حبيت اشوف شنو أسلوب هالمصارعة العنيفة الي اختارتنا صيدة لها اليوم
في المواقف.... نزل صاحبي الجام و دار بينه و بين الفتانة هالحوار البطيخي
المصارعة: قوة
صاحبي: يقويج يا هلا... عسى دوم مستانسين
المصارعة: شفيه صاحبك (الي اهو انا) معصب و عاقد النونة؟
صاحبي: ماعليج منه.. وين رايحين
المصارعة: قهوة ... حياكم معانا
صاحبي: والله ودنا بس مستعيليين (يدري اذا قال أوكيه بشوته من السيارة) هاهاها
المصارعة: خلاص عطني رقمك و أكلمك بعدين
واااخزياااااه.... صاحبي رقم البنت (أو بالأحرى ترقم) جدامي
انا يا جماعة مو قاعد أقول حلال علي و حرام على غيري... مو قاعد اقول انه الشاب عادي "يصيد" و البنت مو لايق عليها.. الي قاعد اقوله ليش الشباب يأذون بنات خلق الله من عمر الدنيا... و ليش البنات حالياُ قاموا يضبطون الشباب (يرقمونهم)؟؟ شنو الي صار و طافني بهالسنة الي غبت فيها عن الديرة؟؟ قلنا شبابنا تغرب و قام يلبس و يصفف شعره مثل الأمريكان اوكييه... البنت قامت تستعرض بملابسها الزقرتية من ايطاليا و غيره اوكييييه... بس ماشوف ظاهرة "الحقني و ألحقك" عندنا في أمريكا او في الدير الثانية (بالأحرى مو بكثرة الي نشوفها بالديرة)!! فليش هالظاهرة موجودة عندنا؟ معقولة بسبب منع الخلط؟ انزين هذا و منع الخلط موجود الديرة معفوسة.. شنو يصير لو تسيب السالفة و نمشي الديرة "أميريكان ستايل" ؟؟ خصوصاً بوجود عقلية للأسف كعقلية الشاب هالأيام (موتر و قصة شعر وصاحبة ... شبي من الدنيا بعد) اهيهيهيهي
يا جماعة ترى منظر مو حضاري و كللللش ما يليق بمجتمع مسلم و متربي على عادات و تقاليد حميدة
الديرة ماصار لها مدة من طلع فيها النفط و ازدهرت و لله الحمد في نعمة... ما مداها تخترب و انشالله ماراح تخترب بوجود ناس واعية و حريصة على مصلحة ديرتها
وين تشوفون الديرة بعد 50 سنة؟ :)

ولادة مفكر بليد

أعتبر هذا البلوق نافذتي على عالم التفلسف و الغشمرة البايخة. تفكيري ما ينتمي لفئة معينة انما هو عشوائي بحت يستسقي الإلهام من البيئة الملوثة داير مدايره.. و أحب أقولكم أي شي يذكر هني عبارة عن رايي الشخصي البهلولي لا أكثر و لا أقل.. و أرحب بجميع تعليقاتكم (بس الي ما تعجبه كتابتي أنا أحترمه و أقوله طق راسك بأكبر طوفة الكترونية تشوفها جدامك) و سامحوني عالقصور