ما يبط جبدك؟

لمن تدش محل ملابس والي يشتغل يقعد فوق راسك يسأل اذا محتاج شي و اذا تبي اي شي ترى اهو موجود للمساعده؟

يرحم أمك أدري انك تبي تساعدني... مو معناته تدش بأخلاقي .. اذا ابيك اناديك لا تخاف

لمن تطلب من هارديز و تلقى الي يشتغل على طوووووول صب لك بيبسي؟

انزين بالله ابي ماي.. ولا سبرايت ولا حتى دايت... شاللقافة؟ ولا بس لانه بالدعاية الوجبة تيي مع كوكاكولا معناته لازم اشربه غصب؟؟

لمن تخلص طلب من مطعم في شارع المطاعم.. و تبي تمشي ولا وحدة مسكرة عليك و مو راضية تمشي الا لمن اهي تخلص طلبها ؟

الله يصك باب رزق ابليسج نفس ما بهدلتيني ميت يوع بطلع و حضرتج متفلسفة و سادة علي

لمن تمشي عالبحر تبي تشم هوا ولا واحد قاعد يمشي مع الجلب ماله (الجلب اطول منه) و الجلب ينابح؟

انزين درينا عندك جلب.. صور معاه و سو لك بطاقة معايدة حق كريسماس مو لازم تمشي معاه و تخرع خلق الله يا فهلوي

لمن اييك مراجع منفس الدوام و يبيك تخلص شغله جنه ماكو غيره بالدنيا و عذره انه مواطن و لازم شغله يخلص؟

واذا مواطن؟ و غيرك شنو نمل؟ لو انا جان كل يوم اقوله تعال باجر معاملتك ما خلصت.. و الطعه شهرين لين ينقع الجنسية و يشرب مايها

لمن تطلب بيتزا و توصل لك باردة؟

شنو ناسين تحطونها بالفرن؟ المشكلة انه راح ايبون لك غيرها بس......... انت يوعاااااان!!! و مو وكته تنطر مرة ثانية

لمن يضيق خلقك و اييك واحد يقولك الدنيا ما تسوى؟

يا فالح... انت سامعها بمسلسل و حاطها ببالك ودك تقولها حق احد صح؟ شنو يعني ما تسوى؟ انتحر يعني؟ خو طبيعي يضيق خلقي لي صارت لي مشكلة.... الله يلوع جبدك مو قاعد تساعد كللللش

لمن تقعد بفرايديز... و تطلب كلينكس و يوصلك لك بعد 4 ساعات... و لمن تتحلطم عالجرسون يقولك .. في زباين بشوف طلباتهم يا باشا

انزين و انا شنو؟ متشرد؟ ولا ياي اصور المطعم و امشي؟ مو ياي ازحر حالي حال الزباين يا بطيخ؟؟ روح ييب كلينكس.. ياللللله

لمن تصفط سيارتك و ترد ولا زالقين الباب و حاطين ورقة مكتوب عليها آسفة مو قصدي؟

ماشالله عالأمانة... والله العظيم لو متعمدة جان ما هديتج... بس دام مو قصدج بمشيها لج... انزين ليش ما حطيتي رقمج عشان نشرب قهوة؟؟

لمن تدش نادي صحي و تشوف يهال يشيلون حديد.. اول ما يطق جم طقة بالثقل يوقف قبال المنظرة و يجيس ايده؟

اهيهي.. غلطان العضلة تكبر أول ما تشوف الثقل مو لازم تشيله حتى... انا اقول طق ابر وايد اشرف لك

لمن تسوق سيارتك عالخليج حزة العصر و الشمس دايماً تكون بعينك؟

وااو حتى النظارة ما تنفع

لمن امك تتهاوش مع الخدامة و الخدامة تطنقر و ماكو احد يغسل ملابسك؟

اي ليييييش؟؟؟؟

لمن ابوك يقعد يمك بالسيارة و يقولك ليش لفيت ورا هذا ليش طوفت هذا ليش ما طوفت هذا ليش مو هاللفة ليش هاللفة؟

يبه انا احبك و احترمك و كل شي.... بس انزل من السيارة لو سمحت... الحين ادق عالوالدة تمرك حبيبي انته والله

لمن اخوك الي اصغر منك بشوي يتعافر معاك و يكون أعرد منك؟

من الفشلة تقوله يبه وخر انا اكبر منك احترمني.. (ايه بطيخ الا خايف يفرك فيك الأرض جدام باجي اخوانك) لووول

لمن أختك تطيح على سوالفك البطالية؟

واللييييييه هذي من وين طلعت بعد.. تعال عشها بره و ساحلها و قولها انه الشباب غير البنات.. عفية عليك صاير سياسي بعد

لمن توقف بطابور المدرسة من صباح الله خير و مالك خلق... و اييلك مدرس يقولك مش لابس الأميص الأبيض ليه؟ بره الطابور يا زبالة؟

انت لو اشوفك بره الثنوية... و اكون متخرج و اخواني معاي... جان وريتك منو الزبالة يا حلو

لمن واحد وراك بالسينما يعطس و يحوشك طشار شوي؟

ماتسوى تكلمه... و هم ما تبي تسكت لانه السعابيل قاعده تنزل من أفاك ليه ظهرك......... انطر لين يخلص الفلم

لمن تشوف واحد راكب سيكل و لابس خوذة و ..... شورت و نعال زنوبة؟

انزين راسك مهم آمنا بالله... و باجي جسمك شنو تحصيل حاصل؟ ولا ناوي تصير نفس المخ الوردي الي بسلاحف النينجا قبل؟

لمن تشوف كل الي يركبون بورش يلبسون كاب أبيض سادة؟

الكاب ايي مع البورش؟ ولا بس جذي نظام دكورة مالها داعي؟ من اليوم و رايح بلبس قحفية و انا راكب سيارتي