عشنا و شفنا

الشاب الكويتي يعجبني بشكل مو طبيعي

في الكويت: ينفش الشعر (تقول حاضن عمود كهربة) و أحلى العطور ( اذا كويحة عادي يحط كريم أساس بعد) حد الشياكة

في أمريكا: يخلط الحابل بالنابل.. اهو شورت مع قميص مبكر اصفر بأزرق بوردي مع قحفية مقضوضة و نعال زنوبة

في الكويت: يكرس حياته في القز عالخليج.. ماتبقى بنية ما يرقمها ما تبقى منقبة ما يحاجيها ما تبقى خدامة ما يضبطها

في أمريكا: داق الثقل.. (في معظم الحالات) و مايلحق أحد لانه يدري اذا لحق بنية (على حظه الوردي) يا تطلع قاصر و يتمصخر من امها و ابوها و امسك يا قضايا و محاكم و فضايح... يا تطلع مو قاصر.. بس هم تشتكي عليه لانه لاحقها (يخافون هني) و عبالها بيذبحها

في الكويت: مجابيس و عيوش و خرفان رايحة و نعام ياي و بعارين (ما يبقى نوع من انواع اللحوم ما يجربه.. ما ياكلني بعد احسن له؟) و ياكل من هارديز جنه ماكو باجر

في أمريكا: يا أما يتعلم يطبخ حق روحه السوالف المذكورة أعلاه (ما عدا النعام لانه يعتبر من الكائنات المهددة بالانقراض.. بس بالكويت لأ.. اهيهي يخليكم ربي) أو انه يحط حق روحه جدول غذائي صحي متكامل و يصير رياضي... أو انه يدور الشباب الي يطبخون و يدق الصحبة معاهم

في الكويت: عادي يتكلم عن القنص و الطيايير

في أمريكا: لا تعليق (تعرفون ادارة الهجرة؟؟) و عادي يدخلون نعال زنوبة المذكورة أعلاه بالسالفة

في الكويت: ما يسوق إلا السيارات الألمانية

في أمريكا: أحلى كمارو و يكتب عالجامة الورانية "مخاوي الليل" محد يكلمه (ممكن يكتب "حبك طعجني") حسب الذوق

في الكويت: اذا لبس جينز ضيق محد يقوله شي.. حتى عادي يبدون اعجابهم بالجينز ماله

Are you wearnig a thong under that? في أمريكا: سهاااالة تسأله وحدة

في الكويت: يقرأ مجلة اليقظة أو الجريمة

Play Boy :في أمريكا

في الكويت: يتعنتر عالبنات و يلعب دور البطل الوسيم الراكب على صهوة جواده الأبيض و قاعد و يكسر بقلوب العذارى (اييه هين.. على ميين) روميو الحبيب

في أمريكا: يدري اذا غلط تسفيرته اب بيزة.. يحترم روحه و يتعرف عالناس من باب الصداقة فقط لا غير

ملاحظة: مو ضروري انه هالسوالف صايرة لي انا .. مجرد سوالف تصير حق الشباب الي يدرسون هني يا جماعة الربع