ملكة الكاكاو

اوكيه.. قبل لا أحط هالبوست فكرت وايد
حسوون مو لايق عليك كلش تحط وصفات أكل.. خلصت المواضيع يعني؟

بس بعدين قلت اوكيه.. بين كل موضوع مليق و موضوع ثاني أملق.. حط لك شغلة من الي تعرف تطبخها و شارك فيها زوار بلوقك الحلوين.. بس عشان تعطيهم "بريك" من بوستاتك اللطيفة... بالعافية

-----------------------------------------------

ملكة الكاكاو.. مقاديرها

بودر كاكاو "نكسويك" أو الأرنب الأدعم الي دمه ثقيل ماكو؟ اييه هذا

بسكويت المطاحن المربع.. او اي بسكوت ثاني مربع (يفضل مال المطاحن عشان لا يقولون "مافيه كويتي؟") لول
كاكاو "فليك".. حق الزينة و التفلسف مو شرط يعني

أربع قواطي (علب) قيمر (قشطة).. على فكرة الطبق بهالمقادير يكفي 8 أشخاص

سكر (شكر) حق كل علبة تقريباً خاشوقة (قفشة أو ملعقة) كبيرة

بيضة.. مو مسلوقة يا جماعة الربع لانه مره قلت حق واحد الوصفة الحبيب راح حط بيضة مفيوحة.. الله يلوع جبده الحلو صار مقبلات

حليب في بادية (أو جدر.. الي تبونه كيفكم) الحين أقولكم ليش

ملكة الكاكاو.. طريقة عملها

خلاط.. تحطون فيه القيمر (القشطة) و 6 ملاعق كبيرة من بودرة الأرنب الأدعم المليق.. مع إضافة السكر و كسروا البيضة داخل الخلاط... شغلوا الخلاط.. وووننننننننننننننن

تخلط المكونات حتى تختفي ملامح القيمر و البيضة و البودرة الكاكاوية.. وقفوا الخلاط

البسكويت... يقمس (يغط) بس مووووو تنقعونه!!! بس حطوه لمدة 3 أجزاء من الثانية في بادية الحليب ... و بعدين يصف صف فني في البايركس (صحن التقديم المبين في الصورة أعلاه) و يصب فوقه الخليط السحري (مو تصبون كل الخليط !! بس شوي لين يغطي البسكويت) اهيهيهي

تعاد عملية تقميس البسكويت في الحليب .. مع تكرار الصف و الصب في البايركس

آخر طبقة في العملية هي المخلوط... بعدين يزين الطبق بفتات كاكاو "فليك" أو البودرة (كما أنا مسوي بالطبق الي فوق) و يوضع الطبق في الثلاجة حتى يمسك (يصير يابس بس مو مثل الايس كريم) ايي نعم

يفضل عمل الطبق قبل العزيمة بيوم (يفضل انكم ما تسوون الطبق حق عزيمة و بعدين يطلع مو شي و تالي تسفلون فيني) ايي نعم

هذي اهي المقادير و الخطوات و اذا فيه اسالة انا راح أكون سعيد جداً بتلقيها... ادري الحلو معظمكم يعرف يسويه بس شسوي سامحوني.. انشالله بحط لكم فناتك قريباً

بالعافية يا جماعة الربع