حسوون و التحضير

كنت أبي أشغل وقت فراغي لا أكثر ولا أقل... صدقوني مو حباً في الشعوذة و الرعب

بينما كنت هائم على وجهي في الصالة... الساعة تشير إلى الثانية و النصف فجراً... أمشي بلا هدف في دوائر غير منتهية من التعذيب النفسي و الاضطهاد الفكري... قررت إني أسوي شي جديد.. أو عالأقل بالنسبة لي جديد... اني أحضر أرواح

رحت أييب ابريج و ماي دافي (مو حق التحضير يبه شفيكم... الوالدة موصيتني أسقي الزرع تالي الليل) بعد ما سقيت الزرع.. جلبت الشموع و البخور المضروب و ثلاث حبات هيل عدل و مسمار مطحون يايني من عمان هدية (الله ياهو الجني بيطلع خنين و ريحته حلوة) المهم ... ماني قايل شنهي باجي المقادير عشان لا يقولون لي مشعوذ و يسكرون مدونتي بالشمع الأحمر ..المهم.. اكمل لكم

شبيت البخور و الشمعة و خلطت المقادير... و عشان تكتمل عملية التحضير.. كان لازم أحط صورة للفنانة الكبيرة أحلام أيام شبابها.. و فعلاً.... بدأ الدخان الأحمر بالصعود... و أخذت الأصوات الرهيبة بالتصاعد........... طلع الجني

أنا: منو انت؟

الجني: ها ها ها ها ... حلوة منك ولد عمي... محضرني و مقعدني من النوم عشان تقول لي منو انت؟ محد محولك ضفدع من قبل؟

التفت الجني نحو صورة أحلام.... خنقته العبرة و نزلت دمعة قهر

أنا: شفيك؟

الجني: هذي بنت عمي... تحولت آدمية من زمان و لا مو أي آدمية.... طقاقة

أنا: هونها و تهون... انزين قول لي... شمعنى انت طلعت لي؟ شنو صار عندكم هناك؟

الجني: انت عبيط ولا شكلك جذي من زمان؟ الظاهر يوم امك ولدتك طحت على يبهتك.. شنو فارقة عندك إذا انا طلعت ولا غيري؟؟

أنا: لا عمي انا مو قصدي أهينك... بس فيني فضول أعرف شنو يصير عندكم هناك لمن بني آدم خبل مثلي يحضر أرواح؟

الجني: انا أقولك يا ثور الله في برسيمه.... انت لمن تحضر الروح... توصل الرسالة على إيميل عمي الشيطان.. و اهو يقرى الطلب.. و على حسب أدوات التحضير ينادي الجني المطلوب

أنا: انزين معناته انت تشتغل بمحل بخور و تحب الخنة صح؟

الجني: امك ما قالت لك لا تستخف دمك على جني؟ ما تدري أقدر أطلع لك حوافر حمار؟

أنا: آسف

الجني: شوف حبيبي... في حالة التحضير الي انت سويتها... كان في أكثر من جني مقدم على طلب حضور إلى عالم البشر... بهالحالة كلنا ندش سحب و الي يطلع اسمه يكون المحظوظ الي يحضر إلى عالمكم

أنا: حبيبي هذي الكويت مو جينيف... مادري على شنو مستانس

الجني: و من قالك أنا ياي أصيف هني؟؟ انا ياي آخذ روحك و قوتك... من جذي مستانس

أنا: لا لا لا تكفة انا مسكين و بلوقر على نياتي ... في ناس يحبوني يقرون مواضيعي لا تحرمني منهم

الجني: شكو محضرني عيل؟ اسمح لي مابي أضيع وقتي معاك يالتيس.. عندك أمنيتين سريعتين قبل ما آخذ روحك.. شنو تبي؟

أنا: أبي آيس كريم بترا

الجني: أتغشمر معاك انا؟ مو مكلم جني من قبل؟ محد حارق كشتك بشمعة من قبل؟

أنا: صج ابي برد.. شيوديني الجمعية هالحزة

بوووووف... ولا آيس كريم بترا عندنا بالصالة.. الجني قعد يطالع تلفزيون على ما أخلص أكل

الجني: زهرمار... خلصني وراي شغل شقول حق المرة ليه تأخرت؟؟؟ تبي توديني بداهية؟؟؟

أنا: افا... قاعد تظرط علي هني.. أثاري فيه من يغسل شراعك هناك؟

الجني: ودك تشوف جني يلعب مصارعة؟

أنا: آسف

الجني: عيل عطني الأمنية الأخيرة

أنا: أبي فلان ينجح بالانتخابات

الجني: فلان الفلاني يصير لك؟؟؟؟؟؟؟

أنا: ايي

الجني: جان قلت جذي من زمان؟؟ قوله حنطور يقولك مشكور عالسيكل و يعطيه العافية دفع أقساط الثلاجة مالتي

أنا: الحين انت جني شتبي بسيكل؟

الجني: المرة متنسية الله يسلمك حامل

أنا: بالسلامة انشالله... يعني منت ماخذ روحي؟

الجني: لا يبا... أصلاً انت صيده أخاف اخذ روحك أتوهق.. الله معاك و حط بالك من التحضير مرة ثانية