إشارة حمراء مع حسوون

الكويتي و قوانين المرور....... واو........ جملة عميقة....... تحمل في طياتها كم هائل من المواقف الكوميدية و التي تعبر عن مدى خفة الدم التي قد يصل إليها بعض الشباب و الشابات الحلوين عندنا.. خلونا نعرف مفهوم القانون عند بعض الشباب و الشابات أول شي

القانون: حاجز أو عرقول صغير يحول بين الشخص و بين هدفه بحيث يجب على هذا الشخص محاولة ثني أو كسر هذا الحاجز اللعين ليصل إلى ما يريد

: المشهد الأول

خلود و حمود.. طالعين من الثنوية و قاعدين يقزون (بدون رخصة قيادة) و حاطين أغنية ميامي (الليلة غير الليالي والله و يا هنياااليي) ما كو شي أحلى من اثنين مراهقين شعرهم سبايكي يقزون عالبحر بدون إجازات... وا كويتااااه اهيهي

حمود: خلود روح سوق شرق خن نقز بالمواقف.. وايد بنات يروحون السوق هالحزة

خلود: يالله فوقه

: المشهد الثاني

حصة و منيرة خلصوا من المحاضرة و يبون يروحون السوق لانه حصة ماعندها صراويل داخلية حق العيد... و منيرة تبي شيرة و موس حلاقة حق ابوها الله يرحمه

حصة: واااي منوور ليش جذي سريعة بالسياقة شوي شوي خو محنا مستعجلين

منيرة: لا مابي اخفف عشان مالي خلق شباب يطالعونا و يتحرشون فينا و يغازلونا

ملاحظة: منيرة جيكرة و خشمها كبير.. آخر مرة شافها واحد عند الإشارة قال لها.. فديت هالخشم والله، ما في مجال تشيلينه عشان أشوف ويهج عدل؟

حصة: انزين روحي سوق شرق في محلات وايد مسوية تنزيلات

: المشهد الثالث

على شارع الخليج.. مهند مطلع صاحبته فريدة.. و عايش أحلى جو رومانسي مع أغنية (ولفتك عمري) و ماسك إيد حبيبته

مهند: انا مادري شلون بتكون حياتي لو مو مصادفج عالنت

فريدة: واي حياتي انته

ملاحظة: مهند ما يحب فريدة... بس هدفه انه يخليها تدفع مكالماته و تعشيه و تغديه في فرايدايز

: المشهد الرابع

حصة و منيرة عالخليج في طريقهم لسوق شرق.. قربوا عند إشارة صفرة (على وشك تصير حمرة) و صادف انه فريدة و مهند عند نفس الإشارة مستعدين للوقوف

حصة: منوور خففي ترى الإشارة قريب تصير حمرة

منيرة: لا مابي.. شوفي هذي السيارة أكيد فيها شباب جدامنا.. ماني واقفة يمهم يتحرشون و يغازلون

حصة: منووووور بلييز خففي!!!! لا تسرعين

خلود و حمود (أسماء كويتية شائعة) مستعدين يطلعون عند نفس التقاطع لانه إشارتهم تكاد تكون خضرة

منيرة تسرع نحو الإشارة.. حصة تصرخ.. خلود يطلع من عند إشارته دايس....... مهند ماسك إيد فريدة المخدوعة

منيرة تطوف حمرة... تصطدم في خلود الي طلع من إشارة خضرة إلا نص جزأ من الثانية مسببة بذلك حادث مروع

: ناتج تلك المشاهد

منيرة: تعرض خشمها لإصابات بليغة أدت إلى تدهور الغدة السنسونية عندها

حصة: دقت على أمها علشان تشتريلها الصراويل

خلود: واسطة عشان يطلعونه من السالفة.. شوي طراقات من الوالد و تسفيل من الوالدة و خلص الموضوع

حمود: ريله انكسرت و طلعوه من فريق السباحة.. قام يروح يلعب بلياردو بالسالمية... بعد أربع سنوات تزوج فلبينية و عاش عيشة سعيدة

مهند: قاعد عالنت يكلم بنات

فريدة: حامل

يا جماعة الربع.... احترموا القوانين.... و استخدموا الحماية مو ناقصين زيادة سكان