Monday, June 19, 2006

أمة الكويت

تحت شعار التقوقع السياسي، و في ظلال العباءة البرلمانية، و في سبيل الإصلاح الوطني الاقتصادي السياحي الحكومي، نمتع أنظارنا في لافتات المرشحين الأشاوس ذوي الغيرة المطلقة نحو مصلحة الوطن... في شوارع الكويت و فرجانها... في دواعيس الفرجان و أزقتها... في أزقة الحمامات و بواليعها.... ما يسمى بعرس الكويت.... الانتخابات
للوهلة الأولي... أخي وأختي البلوقرزية القراء الأعزاء... ينتابكم الشعور بأن هذا البوست سياسي... طبعاً لأ...... أنا بعيد عن كل ما يمت للسياسة بصلة... بصلة و ثومة بعد (كيفي بلوقي أملق لين أقول بس هيهيهيهي) فلا تخافون... انا مخلي السياسة لأهلها
انه لمن دواعي سروري... و مثلجات صدري... أن أستعرض لكم بعض الشخصيات الفذة التي تبرز خلال هذه الفترة الجميلة التي نمر فيها.. ألا وهي فترة الانتخابات
شخصيات لطيفة، مليقة، و قد تكون ذات دم خفيف والله أعلم..... لكنها موجودة.. تعالوا معاي نشوف منو يحوس بهالجو الانتخابي
: المرشح
شخصية أساسية كونه مرشح روحه و تارس الشوارع بصوره، مهمته قبل الانتخابات هي تأليف الشعارات الزائفة معظمها فلسوفية مبالغ فيها و تافهة... و يبدعون الي يكتبون كلام غلج باللغة العربية الفصحة، يعني مثل الشعار الآتي: إن أريد إلا الإصلاح
سلامة عمرك... ماراح أطوف لك هالعبارة إلا لمن أشوف شهادتك بالإبتدائي... بس بتأكد إنك يايب (أ) باللغة العربية و السلامة اللغوية
يحوس، من ديوانية ليه ديوانية، من بيت ليه بيت.. تلقونه يدش بيوت عمره ما دشها... و دواوين ما يعرف منو أصحابها..... و للأسف ليه نجح.... يغير رقم تيليفونه و بيجره و يسوي شعره سبايكي عشان محد يعرفه... و بوق لا تبوق
: المفتاح الانتخابي
هذا المسؤول عن تجميع الأصوات ... و في بعض المناطق مسؤول عن شراء الأصوات و توزيع الشنط النسائية التقليد
ويهه منجب.. يطلع أرقام خلق الله و يتصل يقول لهم "تامرون على شي؟" إي حبيبي أبي بيض أثول تقدر تسويلي ؟؟ و ظهري يعورني ودي بمساج صيني!! يعني انسان أهبل مثله ما شفت ... مستعد يبيع هدومه عشان المرشح يفوز... ما ينلام... دام المرشح يصير تحت أمره ليه فاز
: الناخب
: أشكال و أنواع عدة... نستعرض النخبة منهم
الغيور : يبجي دم بس يدور مرشح يمثله و يوصل صوته... يحب وطنه و صوته صج صج صج أمانه ليه درجة انه ما يصوت إذا ماشاف من يستاهل صوته.... والنعم بأهل الكويت و هذي شريحة لا باس فيها من الشعب
البياع : الله يخسه.. يدور الي يشتري و يروح له.. بعذر انه الديرة خربانه خربانه ليش اهو ما يستفيد؟ الديرة خربانة بأشكالك يالصرصور.. تعال لي أنا ودي أستفيد من حمير أمثالك صراحة محتاج واحد ما عنده ذمة ولا ضمير أبيه محامي
ورى الخيل يا مواطن : هذا الي يشوف امه و ابوه وين يصوتون يصوت وراهم... بغض النظر عن المرشح... سواء كان قريب أوغريب أو يشتري أصوات... هالنوع من الناخبين أوقف لهم و أصفق صراحة... يرضون جميع الأذواق مثل الصراويل الداخلية الملونة
أبي أتعشى : هذا يدور الأكل... تلقاه يحط له كرسي عند راعي الشاورما ولا الصاج و صمونه بإيد و بيبسي بإيد... هني و عافية أقول.. ذيس إس ماي كايند أوف ناخب صراحة
الحريم : أنا اقول سنعوا مطابخكم
: و حصرياً.. أمة 2006
مواطن مو مسجل... و ماعنده فلوس : ليش عيل راز ويهه بالمقرات؟؟ لانه مفلس و ما يقدر يشتري كرت يطالع مباريات كاس العالم فيه..... فالمقر عنده جنات عدن و فردوس... شاشة كبيرة و أكل ببلاش و لااااا ... جمهور بعد هيهيهي ... الله يهنيه
الله يحفظ الكويت من الخراب و يخلي لها أهلها الطيبين
صوتكم أمانة يا جماعة الربع
مرشحكم حسوون

Sunday, June 18, 2006

حسوون و التحضير

كنت أبي أشغل وقت فراغي لا أكثر ولا أقل... صدقوني مو حباً في الشعوذة و الرعب
بينما كنت هائم على وجهي في الصالة... الساعة تشير إلى الثانية و النصف فجراً... أمشي بلا هدف في دوائر غير منتهية من التعذيب النفسي و الاضطهاد الفكري... قررت إني أسوي شي جديد.. أو عالأقل بالنسبة لي جديد... اني أحضر أرواح
رحت أييب ابريج و ماي دافي (مو حق التحضير يبه شفيكم... الوالدة موصيتني أسقي الزرع تالي الليل) بعد ما سقيت الزرع.. جلبت الشموع و البخور المضروب و ثلاث حبات هيل عدل و مسمار مطحون يايني من عمان هدية (الله ياهو الجني بيطلع خنين و ريحته حلوة) المهم ... ماني قايل شنهي باجي المقادير عشان لا يقولون لي مشعوذ و يسكرون مدونتي بالشمع الأحمر ..المهم.. اكمل لكم
شبيت البخور و الشمعة و خلطت المقادير... و عشان تكتمل عملية التحضير.. كان لازم أحط صورة للفنانة الكبيرة أحلام أيام شبابها.. و فعلاً.... بدأ الدخان الأحمر بالصعود... و أخذت الأصوات الرهيبة بالتصاعد........... طلع الجني
أنا: منو انت؟
الجني: ها ها ها ها ... حلوة منك ولد عمي... محضرني و مقعدني من النوم عشان تقول لي منو انت؟ محد محولك ضفدع من قبل؟
التفت الجني نحو صورة أحلام.... خنقته العبرة و نزلت دمعة قهر
أنا: شفيك؟
الجني: هذي بنت عمي... تحولت آدمية من زمان و لا مو أي آدمية.... طقاقة
أنا: هونها و تهون... انزين قول لي... شمعنى انت طلعت لي؟ شنو صار عندكم هناك؟
الجني: انت عبيط ولا شكلك جذي من زمان؟ الظاهر يوم امك ولدتك طحت على يبهتك.. شنو فارقة عندك إذا انا طلعت ولا غيري؟؟
أنا: لا عمي انا مو قصدي أهينك... بس فيني فضول أعرف شنو يصير عندكم هناك لمن بني آدم خبل مثلي يحضر أرواح؟
الجني: انا أقولك يا ثور الله في برسيمه.... انت لمن تحضر الروح... توصل الرسالة على إيميل عمي الشيطان.. و اهو يقرى الطلب.. و على حسب أدوات التحضير ينادي الجني المطلوب
أنا: انزين معناته انت تشتغل بمحل بخور و تحب الخنة صح؟
الجني: امك ما قالت لك لا تستخف دمك على جني؟ ما تدري أقدر أطلع لك حوافر حمار؟
أنا: آسف
الجني: شوف حبيبي... في حالة التحضير الي انت سويتها... كان في أكثر من جني مقدم على طلب حضور إلى عالم البشر... بهالحالة كلنا ندش سحب و الي يطلع اسمه يكون المحظوظ الي يحضر إلى عالمكم
أنا: حبيبي هذي الكويت مو جينيف... مادري على شنو مستانس
الجني: و من قالك أنا ياي أصيف هني؟؟ انا ياي آخذ روحك و قوتك... من جذي مستانس
أنا: لا لا لا تكفة انا مسكين و بلوقر على نياتي ... في ناس يحبوني يقرون مواضيعي لا تحرمني منهم
الجني: شكو محضرني عيل؟ اسمح لي مابي أضيع وقتي معاك يالتيس.. عندك أمنيتين سريعتين قبل ما آخذ روحك.. شنو تبي؟
أنا: أبي آيس كريم بترا
الجني: أتغشمر معاك انا؟ مو مكلم جني من قبل؟ محد حارق كشتك بشمعة من قبل؟
أنا: صج ابي برد.. شيوديني الجمعية هالحزة
بوووووف... ولا آيس كريم بترا عندنا بالصالة.. الجني قعد يطالع تلفزيون على ما أخلص أكل
الجني: زهرمار... خلصني وراي شغل شقول حق المرة ليه تأخرت؟؟؟ تبي توديني بداهية؟؟؟
أنا: افا... قاعد تظرط علي هني.. أثاري فيه من يغسل شراعك هناك؟
الجني: ودك تشوف جني يلعب مصارعة؟
أنا: آسف
الجني: عيل عطني الأمنية الأخيرة
أنا: أبي فلان ينجح بالانتخابات
الجني: فلان الفلاني يصير لك؟؟؟؟؟؟؟
أنا: ايي
الجني: جان قلت جذي من زمان؟؟ قوله حنطور يقولك مشكور عالسيكل و يعطيه العافية دفع أقساط الثلاجة مالتي
أنا: الحين انت جني شتبي بسيكل؟
الجني: المرة متنسية الله يسلمك حامل
أنا: بالسلامة انشالله... يعني منت ماخذ روحي؟
الجني: لا يبا... أصلاً انت صيده أخاف اخذ روحك أتوهق.. الله معاك و حط بالك من التحضير مرة ثانية

Sunday, June 11, 2006

البقر و الحمير تمشي وراه

ما مدى قدرتك على تحمل الضغط، الإهانة، التسفيل، السب، التملطش، أو حتى الطق؟
قد تستغرب الأمر يا بنى آدم لكن قدرتك على التعايش مع الأمور السابقة تصل إلى أقصى الحدود و الأسقف و الخطوط الحمراء و الألغام.... إي نعم
مليئة حياة الإنسان بالمغامرات و التضحيات، فإذا كان في بالك هدف معين تريد تحقيقه... و أصبح المرور في مواقف التمصخر أمر محتم لا بد منه حتى يتسنى لك تحقيق ذلك الهدف... فتوكل على الله... و حسبي الله و نعم الوكيل... و تكبر و تنسى
انزين.. آخر هالكلام شنو؟ ليش الطوالة؟ خلوني أسولف يا جماعة الربع ترى صارلي مدة مو كاتب بوست مثل الأوادم و ودي أتكلم وايد شوي.. حلوة هذي وايد شوي مو؟
صراحة أحس بلوقي ولا شي بدونكم... قرائي الأعزاء... المهم ... نرجع حق موضوع الكرامة و عزة النفس
متى تطق الشرف و متى تدوس على نفسك ؟؟
: صباحك وحش يا باشا
توك قاعد من النوم... حتى الخدامة ما تقدر تدش تنظف الغرفة لسببين
ريحة الغرفة نوم و سعابيل-
نايم مفصخ-
المهم... صحصحت و اخذت دوش حااار عشان يطهرك و يعقمك... بعدين بااارد عشان عيونك تطلع من مكانها
يوم كبير بالنسبة لك... خلصت امتحانات و المفروض درجاتك طالعة... بس يبيلك تروح تتأكد انك حصلت الدرجات المطلوبة لتخرجك المجيد (على اساس انك حمار و ماشي عالحفة) . فتدق السيارة سلف متجهاً إلى الكلية
توصل... و تتفاجأ انه كل درجاتك اوكيه إلا مادة وحدة........... تبي (أ) عشان تتخرج وانت يايب فيها (ب) .. مو مشكلة.. نكلم الدكتور يمكن يتعاطف معانا
: في غرفة التحقيق
الدكتور: نعم
المقرود: الله ينعم بحالك عمي الدكتور
ملاحظة: يكون لقب دكتور مو كفاية
الدكتور: هلا... شتبي عليوي
المقرود: دكتور انا بتخرج انشالله ... بارك لي
الدكتور: فرقاك عيد يبه... دفعة مردي و الهوى شرجي.. ما بغينا نفتك من رقعة وجهك
ملاحظة: هني يبتدي الطالب يفصخ لباس الكرامة و يحطه على جنب
المقرود: بس دكتور أبي منك طلب... محتاج (أ) بمادتك عشان اطلع
الدكتور: اي ليش لأ... تبي أزوجك بنتي بعد؟ حياك عندنا الغدا اليوم
المقرود: شنو غداكم؟
الدكتور: انت اغبى ما خلق ربي... و اسخف ما وجد على الأرض... حشرة... معتوه... شنو الي يخليني أعطيك الدرجة؟
ملاحظة: ان كان لك حاجة عند الجرو قول له عمي
المقرود: عمي.. لو انا غبي جان ما وصلت (ب) بمادتك حياتي
الدكتور: يكون بعلمك انا مساعدك بالدرجة.. ولا انت أصلاً يايب (ج) بالمادة يا حمار البصرة
ملاحظة: يبتدي الطالب يشك بجنسية الدكتور
المقرود: انزين دكتور... انا مستعد اسوي اي شي بس عشان الدرجة هذي.... تكفة
: نهاية أسعد منها ماكو
عليوي و الدكتور و بنت الدكتور في شهر العسل يستمتعون بالهواء العليل على شواطىء جزر الواكي واكي

Sunday, June 04, 2006

eh eh.. One Year Older 7asoon

قعدت من النوم... ولا أنا سنة أكبر من أمس
تركيبة الجملة الي فوق أحسها غلط.. بس عادي.. ما المفروض تحاسبوني على شي جذي و اليوم عيد ميلادي
:طلباتي.. أو بالأحرى أمنياتي هي كالآتي
السلام في العالم-
بيجر-
بوكيه ورد أزرق من جينيفر لوبيز-
يوم راحة و استجمام في جزر الكناري-
ريوق غدا عشا مرق بامية-
كشته في الجزيرة الخضراء-
ثلاثمائة وأربعة وستون دينار كويتي-
يسمون شارع بإسمي-
السيطرة على البلوق سفير-
انتاج فيلم وثائقي عن حياتي.. مدته ثلاث دقائق-
ليتات زينون حق سيارتي-
تمليس دائم-
خمس دوائر-
مخزون لا ينفد من الهمبة الهندية-
أختفي لمدة يوم-
هيهيهي.. و آسف عالقطاعة و طول الغياب.. حيث ان اشتباكي بالانترنت قليل خلال فترة بقائي هنا بالكويت.. لكن انشالله ألحقكم في بوستات لطيفة قريباً
شكراً لكم جميعاً يا جماعة الربع